Kryeministri i Izraelit Benjamin Netanyahu foli sot në një mbledhje të posaçme të qeverisë për të shënuar përvjetorin e masakrës së 7 tetorit.
Kryeministri izraelit iu referua sulmeve si një “ditë e zezë” dhe “sulmi më i tmerrshëm ndaj popullit hebre që nga Holokausti”.
Por, “ndryshe nga Holokausti”, shtoi ai, “ne u ngritëm kundër armiqve tanë dhe bëmë një luftë të ashpër”.
Netanyahu tha se “lufta e ringjalljes” e mëvonshme do të përfundojë vetëm pasi të përmbushen qëllimet e Izraelit.
Këto përfshijnë përmbysjen e Hamasit, kthimin e pengjeve në shtëpi, “parandalimin e çdo kërcënimi të ardhshëm nga Gaza për Izraelin” dhe kthimin e sigurt të izraelitëve në shtëpitë e tyre në veri dhe jug.
“Ne po ndryshojmë realitetin e sigurisë në rajonin tonë,” tha ai.
“Për hir të fëmijëve tanë, për hir të së ardhmes sonë, për të siguruar që ajo që ndodhi më 7 tetor të mos ndodhë më. Asnjëherë më.”
Netanyahu gjithashtu ndau ngushëllimet e tij për ata izraelitë që kanë vdekur në betejë “në Gaza, Liban dhe arena të tjera” që nga 7 tetori.
