PD publikoi sot disa pamje që sipas saj tregojnë parcela të mbjella me kanabis në luginën e Lumit të Vlorës. Sipas opozitës kjo është dëshmi e një biznesi kriminal kombëtar që drejtohet nga ministri i Brendshëm, Saimir Tahiri.
“30 përqind e fitimit të çdo bime të mbjellë ndahet mes shefave të policisë dhe Tahirit. Ky është pazari që garanton mbjelljen, rritjen, korrjen dhe transportin e drogës. Pamjet janë filmuar pikërisht në zonën e Lumit të Vlorës, aty ku Habilajt e Tahirit kanë kontroll absolut mbi territorin.
Parcela pa fund që lulëzojnë, që sjellin qindra milionë euro për bandat e trafikantët, për njerëzit e afërt të Tahirit, i cili, përveç shumë garancive të tjera, u dha Habilajve edhe makinën e tij private, taksinë e drogës AA003GB, për t’u siguruar paprekshmëri e semafor jeshil për lëvizjet e tyre”, tha Sekretari për Aksionin Qytetar i PD-së, Ervin Salianji.
Ndërkohë pas kësaj deklarate ka reaguar Policia e Shtetit, duke marrë autorësinë e pamjeve të regjistruara me helikopter, por tha se ato pamje i përkasin një dosje hetimore për asgjësimin e bimëve narkotike.
Megjithatë policia nuk ka dhënë detaje të tjera për kohën se kur është kryer filmimi, asgjësimin e kanabisit apo kush ishin kultivuesit e tyre. Policia shtoi se ka nisur një hetim për efektivët që kanë nxjerrë këto pamje./LAPSI.AL/
