“Nga viti 1945 deri në vitin 2011, që është censusi i fundit, nuk ka pakica të tjera të identifikuara përveç pakicave që listohen në këtë ligj”.
Edhe pse një javë më parë ministri për Europën dhe Punët e Jashtme, Ditmir Bushati ishte i bindur dhe këmbëngulës në qëndrimin e tij për mosekzistencën e minoritetit bullgar në Shqipëri, përpara fakteve historike dhe presionit të Bullgarisë, deputetët e Komisionit të Ligjeve iu dorëzuan presionit bullgar.
Presion ky që kishte ardhur në zyrat e tyre me anë të një letre nga europarlamentarët.
Deputeti i Partisë Socialiste, Bledi Çuçi tha: “Ka dhe një letër nga disa deputetë europarlamentarë që kërkojnë futjen e pakicës bullgare në listën ku numërohen pakicat kombëtare në Shqipëri”.
Zërat kritikë nuk munguan. Gent Strazimiri, deputet i Partisë Demokratike, tha: “Është një letër e komisionerit kundër diskriminimit në Parlamentin Europian. Nuk është kriter ligjor për tu shpallur pakicë”.
Ndërsa Edmond Panariti i Lëvizjes Socialiste për Integrim theksoi: “Duhet të respektojmë dhe institucionet shqiptare: Akademinë e Shkencave, e cila duhet të shprehet në mënyrë institucionale”.
Por, edhe ata u shuan kur të gjithë votuan në favor të këtij ndryshimi, që e bën minoritetin bullgar minoritetin e 9 në Shqipëri.
Projektligji ngjalli menjëherë reagime të shumta të Sofies zyrtare, reagime të cilat duket se e gjetën të papërgatitur politikën shqiptare. Vetëm një javë pas diskutimit me grupet e interesit, deputetët e të gjitha krahëve politike, zgjodhën të mos marrin parasysh faktet historike të paraqitura, por t’i bindeshin presionit të Sofies zyrtare, nëpërmjet Parlamentit Europian.
Bindje e cila vjen dy muaj përpara se Bullgaria të marrë Presidencën e radhës së BE-së, periudhë gjatë së cilës Shqipëria pret hapjen e negociatave për anëtarësim./tch
