Duket si ëndërr… Ose, më mirë, është ëndërr. Ke pronotuar një biletë për në koncertin e këngëtarit tënd të preferuar, shkon, ulesh në vendin e duhur, shijon këngët e Albanit, por papritur dëgjon nga mikrofoni i tij emrin tënd. Ke fituar një lotari? Jo, ke marrë propozimin për martesë!
Ada Kaloci dhe Zenel Bajrami ishin një çift i zakonshëm që prej 3-vjetësh jetojnë të lumtur dashurinë e tyre. Deri para pak ditësh, kur nga salla e madhe e Pallatit të Kongreseve, publiku u bë njësh me përuljen në gjunjë të Zenelit, ndërsa ai, me unazën në dorë, i propozoi martesë dhe dashuri të përjetshme Adës, të dashurës së tij të zemrës, shkruan Revista Class
Megjithëse kanë shumë vite që njihen, Ada nuk kishte menduar kurrë se një propozim në Pallatin e Kongreseve do t’i jepte vëmendje kaq të madhe. Madje, as Zeneli. Të dy bashkë, ata ishin sot në studion e “Rudina” për të rrëfyer si u gjendën në koncertin e Albanit dhe si e realizuan atë propozim para më shumë se 2 mijë vetave.
Ende të emocionuar, ende të pafjalë, Ada dhe Zeneli tregojnë se gjithçka ka ndodhur në Pallatin e Kongreseve e kanë kuptuar vetëm pasi kanë parë videot e dërguara nga miqtë, sepse të gjithë ngjarjen e kanë përjetuar si të mpirë. Ada, plotësisht e justifikuar, nuk dinte asgjë se ç’po ndodhte me të dhe ç’kishte përgatitur Zeneli, por as ky i fundit nuk i përmbajti dot emocionet kur u përul para saj për t’i kërkuar dorën.
I pyetur si i lindi ideja e këtij propozimi dhe si e gjeti veten në një sallë aq të madhe, Zeneli tregon se ishte thjesht një email, të cilin ai e dërgoi pranë adresës së grupit organizator të koncertit, pas të cilit mori përgjigje pozitive: “Në fakt, ishte thjesht një email, ku kërkohej një video përshëndetëse. Unë mora kontaktet dhe thashë, pse jo, të realizoja propozimin për martesë. Nuk prisja që do të merrja përgjigje pozitive nga stafi organizator, por kur erdhi përgjigjja, aty më filloi emocioni”, – tregon Zeneli duke kujtuar.
Pasi u takua me stafin e koncertit, të dyja palët ranë në një mendje për realizimin, por kishte vetëm një problem: si ta bënin gjithçka spontane që Ada të mos kuptonte asgjë dhe që për të ishte surprizë deri në fund? “Dolëm më idenë se produksioni kishte bërë një përzgjedhje të publikut, do të ishim ne të dy. Pastaj Albani do më jepte mua mikrofonin. Këtu unë do të filloja fjalimin…” – vazhdon me tej Zeneli pa e fshehur emocionin e freskët.
Edhe për fjalimin nuk kishin qenë gjëra të lehta. Diçka mund të kishte përgatitur, mendimet i kishte radhitur thuajse, jo me laps e letër, as jo para pasqyrës. Kishte menduar ta linte veten të lirë, por, siç tregon vetë Zeneli, asgjë nga ato që tha atje nuk ishte e ngjashme me atë që kishte përgatitur. Emocionet e mbytën. Nuk është e thjeshtë para më shumë se 2 mijë vetave të bësh një deklaratë të tillë për njeriun që dashuron.
Gjithçka ishte e improvizuar bukur. Albani thirri emrat e çiftit dhe të dy, edhe pse njëri e dinte dhe tjetri jo, u gjendën në skenë. Ada, e pafjalë, në ëndërr.
“Në fakt, arritëm ta kuptojmë gjithçka ndodhi vërtet vetëm kur pamë videon. Ishim në re. Shijuam bashkë me Albanin edhe këngën tonë të preferuar “Unë dhe ti”, me të cilin Albani na përshëndeti. Realisht, jam akoma shumë e shumë e emocionuar. Është një ëndërr pa fund e bukur…” – tha Ada.
Pas atij propozimi, nga studio e Rudinës, Ada dhe Zeneli japin mesazhin për më shumë pozitivitet në jetë, më shumë harmoni në çift dhe më shumë vlerësim për femrën.
