Është përfolur disa herë se në marrëveshjen e 1 prillit u vendos që Ilir Meta do të ishte president në vitin 2017. Kjo tezë është artikuluar disa herë dhe tani ky debat ka dalë sërish në skenë. A do të jetë Ilir Meta president? Vetë Meta nuk ka pranuar të bëjë komente dhe mesa duket preferon të presë se si do të reagojë publiku ndaj një lëvizje të tillë të mundshme. “Nuk kam asnjë koment për gara të pashpallura”, tha ia sot nga Korça.
Debati del në skenë kur pozicioni i LSI në kampin e mazhorancës ka ndryshuar. Me afrimin e çamëve, LSI nuk është më partia që mund ta rrëzojë Ramën nga karrigia e kryeministrit.
Zgjedhjet në Dibër provuan se ai e ka gjetur kollaj fare zëvendësuesin e rolit të LSI. PDIU i solli fitore në një bastion të djathtë, me mënyra të dyshimta, për të cilat është akuzuar më parë edhe LSI. Blerja e votës dominoi edhe në këto zgjedhje të pjesshme.
Por duke parë që që s’ka më peshën e dikurshme, Meta përdor taktikën. Nëpërmjet deputetëve të ndryshëm të LSI ai ka hedhur sërish idenë se mund të kërkojë postin e kryeministrit.
Këtë duket se paralajmëroi edhe sot në Korçë.
“Gara e vetme ku marr pjesë është ajo e LSI –së, që e konsideroj si sfidë për lëvizje të mëtejshme që do ta nis nga Korça”.
Sfidën e radhës Meta duket se do ta ketë me aleatin e tij, që e sheh veten shumë më të fuqishëm se para 1 prillit të 2013 –ës kur vendosi ta përdorë Metën për të ardhur në pushtet.
Zgjedhjet për president do të jenë testi i vërtetë i aleancës. Rama mund ta mbajë premtimin e dhënë me 1 prill. Ose mund t’i tregojë Metës se kjo nuk është hera e parë që është përdorur. Dhe atëherë Metës do t’i duhet vërtetë të kandidojë për kryeministër, duke dalë i vetëm në zgjedhjet e përgjitshme. /Lapsi.al
