Kryeministri Edi Rama ka reaguar në lidhje me deklaratën e krye-demokratit Lulzim Basha sa i takon njohjes së diplomave shqiptarë në Serbi, duke ironizuar Bashën se njohja e diplomave është kryer kohë më parë.
Nga ana tjetër, nëpërmjet Facebook, ai ftoi Bashën që të mbajë kufirin e gënjeshtrave brenda territorit shqiptar, pasi sipas tij po i turpëron botërisht.
“Njohja e diplomave shqiptare në Serbi është kry ka kohë Lulëzim, Aman mbaje kufirin e rrenave brenda Shqipërisë se na turpërove botërisht”, -shkruan Edi Rama.
Ditën e sotme Basha gjatë komunikimit nga “Çadra e lirisë” duke patur ne krahë ish kryetarin e Komunës se Preshevës Ragmi Mustafen, akuzoi Ramën se për gati tri vite nuk kishte mbajtur premtimin për njohjen e diplomave të studentëve të Luginës së Preshevës.
“Në Preshevë para tre vjetësh kryeministri aktual premtoi mbështetjen e shtetit shqiptar për arsimin, njohjen e diplomave, ndihmë të drejtpërdrejtë për zhvillimin social dhe ekonomik. Asnjë nga këto premtime nuk janë bërë realitet.”, tha Basha nga bulevardi Dëshmoret e Kombit.
