Zv.kryeministrja teknike, Ledina Mandija u shpreh se ministrat teknikë të propozuar nga Partia Demokratike mund të qëndrojnë në detyrë deri në formimin e qeverisë së re.
Mandija zbuloi se është në dëshirën e secilit prej tyre që pas përfundimit të zgjedhjeve, të qëndrojnë ose të largohen.
“Në kuptim të Kushtetutës, ministrat janë në detyrë deri në krijimin e qeverisë së re. Vetë VKM 473 përcakton se Task-Forca do të ushtrojë funksionet e saj deri në mbyllje të procesit zgjedhor. Misioni i ministrave teknikë vazhdon edhe pas datës 25 apo 26 qershor, deri në finalizim të procesit zgjedhor dhe shpalljes së rezultatit përfundimtar të zgjedhjeve. Pas kësaj është në dëshirën e secilit nëse qëndron apo ikën sepse, sipas Kushtetutës, e thashë ministri qëndron deri në ardhjen e qeverisë së re.” – shprehet Mandija në intervistën e saj për Panorama.
Ledina Mandija i jep rëndësi bërjes së një analize mbi punën e secilit ministër teknik, për të dalë në rekomandime për të ardhmen, pasi sipas saj, kjo i shërben të mirës publike.
Mandija u shpreh se në këtë detyrë ministrat, sikurse ajo vetë, duhet të kishin qenë të paktën 3 apo 6 muaj për të realizuar procesin e monitorimit.
Mandija e lexon si histori suksesi punën e ministrave dhe drejtorëve teknikë, pasi shprehet se vetëm në një muaj kohë u arrit të ndalohej fenomeni i përfshirjes së administratës në fushatën zgjedhore.
“Mendoj se në fund të këtij procesi duhet bërë një analizë se cili ishte roli dhe çfarë arritën ministrat teknikë dhe Task-Forca, duke dalë dhe me rekomandime për të ardhmen, sepse kjo i shërben të mirës publike. Koha e ushtrimit të kësaj detyre ishte shumë e shkurtër dhe do të duhej të ishte të paktën 3 muaj apo 6 muaj për të realizuar këtë proces monitorimi. Në një muaj pati shumë vështirësi operimi. Si ministrat teknikë, ashtu dhe drejtorët teknikë bënë maksimumin për të realizuar këtë objektiv. Për mua misioni ynë ishte i suksesshëm, sepse edhe në 1 muaj kohë ne arritën të frenonim fenomenin e përfshirjes së administratës në fushatë zgjedhore, nuk kishte ndodhur më parë”.
Mandija shpreh keqardhje pse nuk ka marrë raste denoncimi të vërteta që para të krimit janë përdorur për ndonjë nga partitë. Në intervistën për gazetën Panorama, zv.kryeministrja teknike u shpreh se i ka kërkuar policisë t’i gjegjë fakte dhe prova për akuzat që janë bërë në publik, por policia i është përgjigjur se raste të tilla nuk ka pasur. Sipas Mandisë, edhe forcat politike nuk i kanë dërguar prova me foto dhe video të blerjes së votës, pavarësisht kërkesave të saj.
“Unë jam e keqardhur që nuk kam marrë asnjë rast denoncimi të vërtetë që para nga burime kriminale të jenë përdorur për këtë apo atë subjekt politik. I kam kërkuar Policisë që të më gjejë fakte dhe prova për akuzat që janë bërë në publik për blerje votash apo përdorime të parave të drogës në zgjedhje dhe nga Policia më janë përgjigjur se nuk ka raste të tilla. Ne u jemi referuar raporteve që na kanë ardhur nga Policia dhe ato konsiderojmë zyrtare. U kam kërkuar forcave politike që akuzat për çdo rast të na i sjellin të dokumentuara me foto dhe video, por asgjë nuk na ka ardhur.” – shprehet Mandija. /LAPSI.AL/
