Në morinë e lajmeve për arrestimin e zyrtarëve në Lezhë për tjetersimin e pronave në bregdet ka qenë edhe një status i gazetarit veteran Frrok Çupi me qasje krahinore. Çupi thoshte se kryeprokurorja e përkohshme, Arta Marku goditi të parin një person të anës së saj. Pra një lezhjan. Në fakt si Arta Marku ashtu edhe kryetari nën akuzë i bashkisë së Lezhës, Fran Frrokaj janë me origjinë nga Fushë-Arrëzi por të rritur në Lezhë. Pra nga e njëjta zonë.
Po kështu Frrok Çupi pretendon se babai i kryeprokurores ka punuar në bashkinë e Lezhës dhe Fran Frrokaj nuk e kishte hequr nga puna. Kaq ka mjaftuar që të reagojë numri 1 i akuzës në vend. Përmes një reagimi të zëdhënësit të Prokurorisë së Përgjithshme mësohet se Ndrec Marku (babai i kryeprokurores) nuk ka punuar asnjë ditë në bashki dhe se sot është në pension. Po kështu prokuroria përpiqet të theksojë se “babai i Arta Markut nuk ka ndonjë të dhënë për të treguar përçarje mes njerëzve apo mes lezhjanëve”.
Më poshtë të plota: reagimi i prokurorisë dhe statusi i Frrok Cupit
Pas arrestimit të kryebashkiakut Fran Frrokaj me akuzën e grabitjes së pronave përmes tjetërsimit dhe falsifikimit të dokumenteve, në mediat online prej ditës së djeshme po qarkullon një lajm që babai i Kryeprokurores Arta Marku punon pranë bashkisë së Lezhës, si inxhinier në një nga ndërmarrjet e institucionit.
Në fakt, babai i Prokurores së Përgjithshme, Ndrec Marku, nuk ka punuar ndonjëherë në bashkinë e Lezhës. I ati i Prokurores së Përgjithshme, ka qenë me profesion teknik i mesëm miniere dhe jo inxhinier. Babai në pension i Arta Markut as ka punuar në bashkinë Lezhë, as ka qenë inxhinier. Madje, ai ka është në pension prej shumë vjetësh dhe nuk ka ndonjë të dhënë për të treguar përçarje mes njerëzve apo mes lezhjanëve.
Statusi i Frrok Cupit
Kur i vunë prangat sot në mëngjes kryetarit të Bashkisë së Lezhës, Fran Frroku, dikush i pëshpëriti në vesh: “Kemi urdhër nga Arta Marku të të arrestojmë…”.
Si Frani edhe Arta janë rritur në Lezhë; madje me sa mbaj mend- babai i Artës (Prokurore e Përgjithshme) është akoma inxhinier në një nga ndërmarrjet e Bashkisë në Lezhë… Mirënjohja e njërit për tjetrin, mes dy lezhjanëve- u manifestua sot: Zonja Marku urdhëroi arrestimin e zotit Frroku; ndoshta edhe pse kryetari i Bashkisë nuk kishte pushuar nga puna të atin e Artës…
Por këto janë hollësira sa për hyrje bisedash… Fjala se ‘Njeri për Njeriun është Lezhjan” ka lindur në biseda sarkastike mes gazetarëve aty nga viti 1994, në Klubin e Fidelit. Atëherë kishte ndodhur njësoj si sot, që disa gazetarë lezhjanë ishin burgosur dhe disa lezhjanë të tjerë mbanin anën e Policisë që i burgosi…
Përsëri këto duken si hollësira. Aforizma e re: “Njeriu për njeriun është lezhjan”, ishte transplantuar mbi një aforizëm të vjetër që thotë se “Njeriu- ujk për njeriun”. Tani kjo ka marrë trajtën e tretë: “Ujku për ujkun është lezhjan”.
… Por që ka brenda disa të vërteta sa të kohës, aq edhe të psikologjisë dhe të metodës për mbajtjen e pushtetit. Pushteti i diktaturës komuniste u vendos me vështirësi në Veri të Vendit; dhe arsyet pse veriu nuk e do komunizmin, dihen. Veçse diktatura e Hoxhës gjeti mënyrën si t’i dominonte krenarinë dhe besimin në Veri të vendit. Diktatori mori në dorë taktikën kriminale që ‘çdo Verior të kthehet në Ujk për veriorët”. Si të thuash sot se ‘Lezhjani është ujk për lezhjanin”…
Qysh në luftën e parë për pushtet komunist, diktatori nxiti në veri luftën civile ‘në emër të Partisë’. Pas çlirimit të vendit nga pushtuesi i huaj, Hoxha ngriti çeta ‘heronjsh’ për të vrarë fshatarët e tyre në Veri. Në krye të Çetës së Vigut (Mirditë) u vu një mirditor nga Miloti: Ndoc Dedë Marku… Ndoci nga Miloti, me katër të tjerë: një Ndoc tjetër (Mazi), Hudajet Lezha, Naim Gjylbegu… nga Shkodra dhe shkuan në fshatin Vig për të vrarë mirditorë. Mirëpo, fat i keq, mbetën në fushë të betejës, dhe Hoxha nuk i bëri as dëshmorë…
Kështu ka ndodhur. Edhe aktivistet e rinisë komuniste kështu u përdorën. Arta Marku është tipike aktiviste bolshevike për nga pamja dhe qëndrimi; megjithëse paska origjinë të vuajtur nga komunizmi.. Mirëpo Artën e kanë përdorur si ‘Ujk’ lezhjan kundër lezhjanëve… Para disa ditësh në Lezhë u ndodh ministri i Brendshëm, një vlonjat që nuk është lezhjan, por nuk bëri asgjë për të kryer arrestime… Sepse është Arta, ose çdo Artë tjetër nga Lezha, që përdoret për të bërë arrestime…
Se po të ishte ndryshe, burgosja për tjetërsim tokash e pronash, duhej të fillonte në Kavajë- me ish kryetarin e Bashkisë… Duhej të fillonte në Elbasan me kryetarin Bashkisë… Duhej të fillonte në Vlorë me kryetarin e Bashkisë që tjetërson prona dhe blen makinë me çmim të lartë sa për të ushqyer gjysmën e të varfërve në qytet…
Mirëpo ata nuk kanë “Lezhjane”. Ndryshe: po të ishin lezhjanë dhe të kishin Lezhjane me hekura, sonte do të ishin në burg. Si Ujku i zënë në qark nga Ujku i vet…/opinion.al
