Pas disa ditësh spekulime, u konfirmua se udhëheqësi i Koresë së Veriut, Kim Jong Un ka vizituar Kinën.
Vizita, e konfirmuar nga Kina dhe Koreja e Veriut, është udhëtimi i parë i Kimit jashtë vendit prejse ai ka marrë detyrën në vitin 2011.
Kim ka pasur “bisedime të suksesshme” me liderin kinez, Xi Jingping, në Pekin, raportoi agjencia kineze e lajmeve Xinhua.
Kina është aleatja kryesore ekonomike e Koresë së Veriut.
Analistët kanë paralajmëruar se Phenjani do të konsultohet me Pekinin përpara samiteve të planifikuara me Korenë e Jugut dhe Shtetet e Bashkuara.
Kim pritet të takojë presidentin jugkorean, Moon Jae-in, në prill, dhe presidentin amerikan, Donald Trump, në maj.
Gjatë vizitës, Kim siguroi homologun e tij kinez se ai ka vendosur të heqë dorë nga armët e tij bërthamore, njoftoi Xinhua, por me disa kushte.
“Çështja e denuklearizimit të Gadishullit Korean mund të zgjidhet, nëse Koreja e Jugut dhe Shtetet e Bashkuara u përgjigjen përpjekjeve tona me vullnet të mirë dhe krijojnë atmosferë të paqes dhe stabilitetit”, raportohet të ketë thënë Kim.
360grade.al
