Për 21 janarin ka prova të reja. Kështu u shpreh gazetar Artan Hoxha, i ftuar në studion e lajmeve të Ora News me gazetaren Beti Njuma. Hoxha tha se hetimi dhe gjykimi i kësaj çështje janë bërë qëllimisht për të dëmtuar rezultatin e vërtetë të kësaj ngjarje.
“Sigurisht që ka prova. Kemi një ngjarje që dimë vetëm dy nga viktimat kush i ka vrarë. Dimë që Agim Llupo ka qëlluar mbi Ziver Veizin dhe Ndrea Prendi ka qëlluar mbi Faik Myrtajn. Ne kemi dy autorë, dhe nuk janë dy gardistë të zakonshme.
Ka qëlluar komandanti i Gardës dhe shefi i shtabit të batalionit special, që prezumohen dy drejtuesit më të stërvitur, më të aftë për të përballuar një trysni të tillë. Ndërkohë vrasja e Hekurn Dedës që për mua është shumë e qartë, pamjet filmike dëshmojnë qartë kush e vret Hekuran Dedën. Jam skandalizuar kur prokuroria nuk ka arritur ta provonte.
Vrasja e Aleks Nikës, po ashtu është e provuar kush e ka vrarë. Duhej vetëm një eksperiment i thjeshtë hetimor që të provonte, gjë të cilën e kanë bërë agjenci të huaja, të cilat e kanë bërë për llogari të vet. Mua më ka shqetësuar mënyra sesi ata që organizuan 21 janarin, pra mënyra si shpejtuan ta devijonin hetimin dhe të arrinin në disa vendime gjyqësore që sot është vështirë të kthehen.
Tetë vjet nga ajo ngjarje ne nuk kemi ndëshkim të autorëve fizikë, nuk po themi të urdhëruesve. Kjo është një padrejtësi e madhe. U është premtuar drejtësi. “, tha Artan Hoxha.
Gazetari Hoxha tha se kjo ngjarje është një krim shtetëror i dokumentuar.
v.l/ Dita
