Nga Euronews Albania
Kuvendi do të votojë sot ligjin Për proceset kalimtare të pronësisë në Shqipëri. Nisma parashikon mbylljen e hipotekimit të tokave të ndara me ligjin 7501 si edhe të tokave bujqësore në zonat ku nuk është zbatuar ky ligj.
Në studion e Euronews Albania, zv/ministrja e Bujqësisë, Gjeçi sqaroi se ligji në fjalë ka të bëjë me përfundimin e disa proceseve që duhet të kishin përfunduar prej kohësh, siç është legalizimi apo pajisja me tituj dhe dokumentin e pronësisë të fermerëve që janë pajisur me tokë bujqësore sipas ligjit 7501.
“Rreth 5 për qind e tyre nuk kanë arritur të marrin titullin e pronësisë mbi tokëm bujqësore. Dhe pjesa dërrmuese që e kanë titullin në pronësi nuk mund ta regjistrojnë në hipotekë. E përdorin prej 30 vjetësh tokën por nuk përfitojnë dot nga grantet e qeverisë.
Ligji 7501 i tokës bujqësore ka nisur 30 vjet më parë dhe nuk ka përfunduar, madje ka prodhuar fermerë që kanë marrë titullin e pronësisë së tokës dhe të tjerë që nuk kanë ende titullin e pronësisë për arsye të ndryshme”, – tha ajo.
Zv. ministrja sqaroi se ky ligj nuk ka të bëje me ish-pronarët, të cilët siç sqaroi ajo i prek tjetër legjislacion që nuk preket me këtë pr/ligj dhe ka lidhje me ATPP, Agjencinë e Trajtimi të Pasurive të Paluajtshme.
“Nuk ka të bëjë me ish-pronarët, por me proceset e nisura 30 vjet më parë”, – tha ajo.
