Mediat finlandeze kanë publikuar sot detaje rreth “terroristëve” që Turqia kërkon t’i dorëzohen. Turqia ka kërkuar që Finlanda të ekstradojë dy shtetas turq nga një “organizatë terroriste fetullah”, gjegjësisht Lëvizja Gylen.
Ministria e Drejtësisë e Finlandës ka refuzuar t’i ekstradojë. Sipas vendimeve të Ministrisë së Drejtësisë, Turqia nuk ka raportuar ndonjë krim specifik për të cilin këta persona janë shpallur fajtorë.
– Thjesht anëtarësimi në një organizatë nuk është vepër penale sipas ligjit finlandez, thuhet në vendimin e ministrisë.
Finlanda nuk e ekstradoi në Turqi një person që u dënua për djegien e ambasadës turke në Helsinki në vitin 2008, sepse ai kishte kryer dënimin në Finlandë dhe tani është shtetas finlandez.
Turqia kërkoi gjithashtu ekstradimin e një shtetasi finlandez i cili ishte dënuar në Turqi për anëtarësim në PKK, por Ministria e Drejtësisë e refuzoi kërkesën plotësisht për shkak të nënshtetësisë finlandeze.
Finlanda ka marrë dhjetë kërkesa ekstradimi nga Turqia deri në fillim të qershorit, nga të cilat shtatë janë zgjidhur deri më tani. Kërkesat janë të vitit 2019-2022.
Finlanda mund të pranojë ekstradimin, nëse akti për të cilin personi akuzohet është i dënueshëm si në Finlandë ashtu edhe në vendin e destinacionit. Dënimi maksimal për një krim duhet të jetë së paku një vit burgim në Finlandë./Panalbanian.com
