Sekretari amerikan i Mbrojtjes, Lloyd Austin po trajtohet për kancerin e prostatës, sipas një deklarate të martën nga Qendra Mjekësore Ushtarake Kombëtare Walter Reed.
Deklarata zbuloi se kanceri u zbulua në fillim të dhjetorit. Ai iu nënshtrua një procedure kirurgjikale minimale invazive më 22 dhjetor të quajtur prostatektomi për të trajtuar kancerin, shkruan CNN.
“Ai ishte nën anestezi të përgjithshme gjatë kësaj procedure. Sekretari Austin u shërua pa probleme nga operacioni i tij dhe u kthye në shtëpi mëngjesin tjetër. Kanceri i tij në prostatë u zbulua herët dhe prognoza e tij është e shkëlqyer”, thuhet në deklaratë.
Më parë ishte e paqartë nëse Austin kishte qenë nën anestezi gjatë procedurës, të cilën Pentagoni nuk e kishte zbuluar më parë dhe nuk e kishte paralajmëruar Shtëpinë e Bardhë.
Pentagoni ishte përballur me pyetje intensive pasi u zbulua të premten se ai ishte pranuar në Walter Reed më 1 janar dhe ishte shtruar në spital për ditë të tëra pa njoftuar publikun. Më pas u raportua se Biden, zyrtarë të lartë të sigurisë kombëtare dhe madje edhe Zëvendës Sekretarja e Mbrojtjes Kathleen Hicks, e cila kishte marrë detyrat e Austin, nuk ishin në dijeni për shtrimin në spital të sekretarit të mbrojtjes deri tre ditë pasi ai u pranua.
360grade.al
