Ministrja e Drejtësisë, Etilda Gjonaj, iu përgjigj presidentit Ilir Meta, pasi ky i fundit tha se do ta kallëzojë penalisht në SPAK.
Marrëzi të radhës e quan ministrja reagimin e kreut të shtetit, megjithëse shprehet e gatshme për t’u përgjigjur para Prokurorisë së Posaçme kundër Krimit të Organizuar dhe Korrupsionit.
Gjonaj shtoi se sa i takon dorëheqjes, Meta ka në dorë vetëm të tijën dhe të askujt tjetër.
“E përshëndes Presidentin që pas disa shfaqjesh publike pa ekuilibër etik, ka zgjedhur t’i drejtohet SPAK me një kallzim penal për mua; një marrëzi e radhës po të paktën në rrugë institucionale, madje drejt një institucioni të dalë nga Reforma që ai lufton pa fre!
Jam e gatshme t’i përgjigjem ligjërisht, me të gjithë përgjegjësinë po edhe me krenarinë që i përkas Frontit të Reformës në Drejtësi, denigruesit botërisht të njohur të kësaj reforme jetike! Sa për dorëheqjen zotëria ka në dorë vetëm të tijën dhe të askujt tjetër.”, shkroi Gjonaj.
Presidenti Ilir Meta, ka kërkuar dorëheqjen e ministres së Drejtësisë, Etilda Gjonaj dhe ka njoftuar se brenda ditës së hënë do ta kallëzojë atë penalisht.
Kreu i shtetit shtoi se qytetarët shqiptarë dhe partnerët ndërkombëtare u njohën dje me veprat penale të shpërdorimit të detyrës dhe falsifikimit flagrant të kryera nga institucionit të ministrit të Drejtësisë, lidhur me KED.
Meta shtoi se provat do i dorëzohen SPAK, ku sipas tij rezulton se është përfshirë drejtpërdrejtë Etilda Gjonaj, por dhe funksionarë të lartë të këtij institucioni, në varësi të saj, dhe në llogari të skenarit mafioz të kapjes së Gjykatës Kushtetuese.
Presidenti tha se Gjonaj ka urdhëruar Sekretarin e Përgjithshëm të dërgonte për botim në Fletoren Zyrtare një vendim, që duhet botuar vetëm në faqen e Gjykatës Kushtetuese.
“Të gjithë qytetarët shqiptarë dhe partnerët ndërkombëtar u njohën dje me veprat penale të shpërdorimit të detyrës dhe falsifikimit flagrant të kryera nga institucionit të ministrit të Drejtësisë, lidhur me KED. Provat do ia dorëzojmë SPAK, ku rezulton se është përfshirë drejtpërdrejtë Etilda Gjonaj, por dhe funksionarë të lartë të këtij institucioni, në varësi të saj, në llogari të skenarit mafioz të kapjes së Gjykatës Kushtetuese. Gjonaj ka urdhëruar Sekretarin e Përgjithshëm të dërgonte për botim në Fletoren Zyrtare një vendim, që duhet botuar vetëm në faqen e Gjykatës Kushtetuese. Ministrja nuk ka asnjë rol të dërgojë aktet e KED për botim. Ka urdhëruar botimin pa ia kërkuar askush. Ministrja ka shpërdoruar detyrën, falsifikim dhe ndërhyrje e paligjshme në proces. Brenda ditës së hënë do depozitoj pranë SPAK kallëzimin penal ndaj ministres Etilda Gjonaj dhe jo vetëm.”, tha Meta./
