Pak ditë më parë Greqia u trondit nga një ngjarje e rëndë, ku një 55-vjeçar vrau vajzën e tij 19-vjeçe. Ky lajm u përcoll gjerësisht në media sërish ditën e sotme, e madje edhe në mediat shqiptare pasi sic u raportua arsyeja e krimit ishte mospranimi i lidhjes së vajzës, Irinit, me një djalë shqiptar.
Por në të vërtetë nuk është kjo arsyeja e krimit. Në një intervistë të gjatë dhënë për një kanal grek, nëna e vajzës ka treguar me detaje të gjithë historinë, që nga arsyet e divorcit me vrasësin e të bijës, e deri në ditën kur mori lajmin e rëndë.
Ajo ka treguar se prej disa vitesh i dha fund martesës me bashkëshortin pas problemeve të vazhdueshme që kishte me këtë të fundit, i cili sipas saj nuk punonte, dhe shpesh kishte ushtruar dhunë fizike mbi të. Por ajo ka theksuar se asnjëherë nuk është sjellë keq me dy fëmijët e tyre, Irinin dhe Aleksandron. Pas ndarjes ajo ishte larguar në Kerkira (Qerqia) pranë familjes së saj, së bashku me djalin, ndërsa Irini kishte qëndruar në Athinë me të atin. “Irini nuk donte të vinte në Kerkira, sepse ajo në Athinë kishte çdo gjë, shtëpinë e saj, shkollën, dhe të dashurin që e donte shumë”, ka treguar ajo.
E pyetur për historinë e të dashurit të vajzës ajo është shprehur se ata ishin prej një vit e gjysmë bashkë, dhe se bashkëshorti i saj dhe ajo ishin shumë dakord me këtë lidhje edhe pse e dini që në fillim se ai ishte nga Shqipëria. “Irini kishte një vit e gjysmë e lidhur me Spiron. Ai e donte shumë dhe kujdesej shumë për vajzën time. Që në fillim na kishte treguar se ishte me prejardhje nga Shqipëria dhe se kishte lindur dhe jetonte në Greqi. Ne e kishim pranuar pa asnjë problem lidhjen e tyre. Ai hynte dhe dilte në shtëpinë tonë, dhe babai i Irinit kurrë nuk më tha që nuk i pëlqente se ishte Shqiptar apo për ndonjë arsye tjetër. Madje Irini dhe Spiro kanë shkuar edhe në Shqipëri për pushime”, ka rrëfyer ajo.
“Por një ditë kur vendosëm të shkojmë në shtëpinë e ish-vjehrrës sime, Irini më tha nëse mund ta merrte dhe të dashurin e saj për t’ia prezantuar gjyshes. Ne pranuam pa asnjë problem. Por kur i tregoi gjyshes se Spiro ishte nga Shqipëria, ajo filloi të ankohej sepse është raciste ndaj tyre. Prej asaj dite filloi të ndryshojë pak dhe qëndrimi i babait të Irinit i cili e dëgjon shumë nënë e tij. Por sërish nuk patëm kurrë probleme për këtë fakt”, pohon nëna e të resë. Ndërkohë ajo ka bërë publike dhe mesazhet që ka shkëmbyer me të bijën ku ajo i thoshte që të mos kthehej më në shtëpi me të sepse babai i saj nuk ndryshonte dhe se nuk do të ishte kurrë e lumtur.
Këto mesazhe kanë rënë në dorë të tij dhe dy ditë para ngjarjes së rëndë, ai i ka dërguar një mesazh ish-gruas nga profili i Facebook-ut të djalit të tyre të vogël ku i thoshte se meqë ajo nuk kishte pranuar të kthehej me të dhe nuk i kishte sjellë djalin për ditëlindje, tani do të vuante si ai. “Të gdhiu ditë dhe jetë e zezë e ëmbla ime. Siç me dhurove dhimbje vazhdimisht duke më mbajtur larg djalin, akoma edhe në ditëlindjen e tij, ashtu do të ta kthej dhe madje edhe më keq. Që të mësosh edhe ti që të jetosh çdo ditë tani e tutje me dhimbje dhe pendesë e ëmbla ime. Më vjen keq, ti dhe vajza jote e zgjodhët këtë. I lexova mesazhet e tua dhe të vajzës tënde, sharjet e saj, gënjeshtrat e saj ndaj meje dhe planet tuaja pas shpinës time. Më vjen keq! U lëndova… u lëndova shumë! Kur ta marrësh këtë mesazh do të thotë që do të jemi që të dy të vdekur.
Më dhe shumë dhimbje dhe tani do të kthehet”, shkruhej në mesazhin e tij. “Unë ende nuk e kam një përgjigje përse ma vrau fëmijën tim. Dhe për këtë dua ta pyes deri sa të kem frymë… përse ma vrau vajzën”, shprehet mes lotësh nëna e Irinit. Mediat greke nuk kanë përmendur asnjëherë si shkakun e vrasjes lidhjen e vajzës me djalin nga Shqipëria, por dyshohet se e ka kryer këtë krim si kundërpërgjigje pas braktisjes nga e shoqja si dhe gjetjes së mesazheve të se bijës e cila shprehte nervozizëm dhe pakënaqësi ndaj tij si dhe e paralajmëronte të ëmën të mos kthehej në shtëpi pasi ai do ta vriste.
