Ambasadori amerikan Donald Lu flet edhe një herë tjetër për peshqit e mëdhenj. Në një intervistë dhënë kryeredaktorit të gazetës Dita, Adrian Thano, ambasadori Lu shprehet se shqiptarët janë të lodhur nga pritja 27-vjeçare për drejtësi. Po ashu ai thotë se efektet e para të drejtësisë janë ndjerë tashmë, pasi ka njerëz të korruptuar që janë trembur.
Ndërkohë, në lidhje me ata që i quan peshq të mëdhenj ai ka pyetur sërish se ku janë këta peshq që u premtuan se do të kapeshin. Lu është shprehur se nuk duhen premtime, por rezultate konkrete në lidhej më këtë çështje.
“Populli shqiptar me të drejtë është lodhur nga pritja për 27 vjet për drejtësi. Jam optimist se do të shohim dëgjesat e para për vetingun në shkurt. Po ashtu jam optimist se parlamenti do të ngrejë Këshillin e Lartë të Prokurorisë në mars ose prill, çka i hap rrugën përzgjedhjes së një Prokurori të Përgjithshëm të ri dhe krijimit të SPAK dhe BKH.
Efektet e para janë ndjerë tashmë. Ka njerëz të korruptuar që kanë frikë. Reforma e gjyqësorit ka filluar dhe populli shqiptar duhet të jetë i paduruar për frytet e kësaj reforme. Ku janë peshqit e mëdhenj të premtuar? Këtë pyetje i bëj çdo zyrtari të qeverisë që takoj. Shqiptarët kanë parë njëfarë përparimi por jo rezultatet e mëdha që presin. Gjyqi i Emiljano Shullazit është drejt fundit. Në dhjetor, Gjykata e Lartë ra dakord të shqyrtojë lirimin para kohe të Lul Berishës nga burgu.
Policia ka rritur në mënyrë dramatike përpjekjet për të kapur Klement Balilin. Por nuk duam premtime, duam rezultate. Njerëz seriozë në qeveri dhe në opozitë kërkojnë rezultate. Kjo përpjekje ka mbështetjen e plotë të prokurorëve federalë të SHBA dhe agjencive ligjzbatuese amerikane. Dhe ka mbështetjen time të plotë.” – tha ambasadori amerikan.
