Nga Mentor Kikia
Të jesh kryeplak fshati, mesa di unë, merr vetëm 15 mije lekë në muaj dhe nuk ke asgjë në dorë për të bërë korrupsion. Ndaj dhe kryeplaku i fshatit Podgorije në Korcë, tani person në kërkim, që kishte mes të tjerave edhe një makinë Hummer, nuk i ka bërë paratë dhe pasuritë duke shfrytëzuar postin. Ai ka qenë thjeshtë një kriminel, që ka vrarë, ka kultivuar e shitur drogë, dhe që i shpëtonte drejtësisë.
Dhe, për këto merita, PD e kishte përfshirë në radhët e veta si një dorë e fortë në fshatin e tij. Në këtë kuadër kishte shërbyer edhe si inspektor i ruajtjes së pyjeve në atë zonë. E merrni me mend se si mund ti ketë ruajtur pyjet ai? Kryeplak ishte “zgjedhur” pasi i kishte vdekur i ati, që e mbante këtë detyrë më parë, dhe mesaduket ky do ia trashëgonte të birit, që, sikurse doli nga raporti i policisë, ishte po kaq i talentuar për këto punë sa edhe i ati.
Edhe një zv/drejtor hekurudhe, për segmentin Durrës-Shijak, u arrestua. Një Zot e di që si mund të ketë drejtor dhe zv/drejtor linja hekurudhore Durrës-Shijak, por kjo është tjetër punë. Ai kishte ndërtuar një serë me prozhektorë e paisje të tjera, të përshtatshme për të rritur kanabis në kushte artificiale. Edhe ky nuk besoj se u bë kultivues dhe trafikant droge, duke shpërdoruar postin e përgjegjësit të hekurudhës së Shijakut. Edhe ky ka qenë i dalluar më parë në këtë drejtim dhe për këtë arsye edhe është rekrutuar nga LSI, në politikë dhe administratën e hekurudhës.
Pra këta dhe shumë si këta, nuk janë inkriminuar pasi u bënë pjesë e pushtetit, por u bënë pjesë e pushtetit duke qenë kriminelë dhe posaçërisht për këtë arsye. U bënë, sepse partive u duhen njerëz të fortë për të siguruar vota, ndaj afrojnë të tillë njerëz dhe më pas u japin liri veprimi të vazhdojnë punët e tyre të pista. Ne sapo kemi miratuar dhe sapo ka hyrë në fuqi ligji për dekriminalizimin. A e ndalon ky ligji këtë gjë?
Asnjëherë- mendoj unë. Kriminelët që ndalon ligji janë ata që kanë qenë dënuar. Por më të rrezikshmit as janë dënuar as janë arrestuar. Ndaj dhe dekriminalizimi i vërtetë duhet bërë mu atje lart fare, kë kupolën drejtuese të politikës. Atje ku rekrutohen kriminelët si skuadra ndihmëse elektorale. Dhe këtë s’ka ligj dhe perëndi që e ndalon në këtë vend, vecse vullneti i atyre që drejtojnë politikën.
Foto: E para, djali i kryeplakut te Podgorijes. E dyta, pjese nga magazina e kultivimit te droges
