Kryeministri Edi Rama ka qenë në Bruksel sot dhe menjëherë pas takimeve të rëndësishme që ka patur, shkruan në rrjetet sociale se “Shqipëria meriton rekomandimin për hapjen e negociatave me BE”.
Kreu i qeverisë shqiptare ishte sot në takimin e Këshillit të Stabilizimit dhe Asocimit ndërmjet Shqipërisë dhe Bashkimit Europian, me Përfaqësuesen e Lartë Federica Mogherini dhe Komisionerin për Zgjerimin Hahn.
Sipas Ramës, “U theksua fort progresi i qëndrueshëm i Shqipërisë drejt marrjes së rekomandimit për çeljen e negociatave për anëtarësim, ku vlerësim të veçantë mori reforma në drejtësi, e cilësuar si mbresëlënëse, po edhe rezultatet kundër krimit e korrupsionit, progresi në zbatimin e masave të reformës në administratën publike dhe në fushën e të drejtave të njeriut”.
Përfaqësuesit e lartë të BE-së i kërkuan Ramës, që reforma në drejtësi të mos mbetet vetëm në letër, por duhet shoqëruar me “këputjen” e “kokave të mëdha” të krimit dhe korrupsionit në politikë dhe jo vetëm.
Rama në këtë takim shoqërohej dhe nga kryetarja e Komisionit Parlamentar të Integrimit, Majlinda Bregu, si dhe nga ambasadorja e BE-së në Tiranë, Romana Vlahutin.
Kryeministri Rama gjatë takimit me Mogherinin, u pa disa herë që ta merrte me të mira këtë të fundit me vështrime të ëmbëla, apo ëprqafime të ngrohta.
Por diplomacia e butë e Ramës dhe “flirtimet” politike zor se do të funksionojë, për sa kohë reforma në drejtësi nuk do të nisë të zbatohet./Mapo.al
