Të dielën e 24 shtatorit përjetuam sulm agresor të bandave kriminale e terroriste të Serbisë, jo vetëm ndaj Policisë së Kosovës, por edhe ndaj shtetit, republikës e rendit dhe sigurisë tonë, theksoi sot në Kuvend kryeministri i Kosovës, Albin Kurti.
“Sulmi i orkestruar nga bandat e maskuara kriminale e terroriste vrau zyrtarin tonë policor Afrim Bujakun dhe plagosi një zyrtar tjetër. Ishte ditë e rëndë për vendin tonë. Vrasja e tij u kthye në angazhim më të shtuar në luftimin e bandave kriminale e terroriste dhe në fitore të betejës nga Policia e Kosovës”, tha Kurti.
Kryeministri shtoi se terroristët ose janë vrarë, janë arrestuar ose janë në ndjekje pasi u arratisën.
“Afrim Bunjaku është heroi më i ri i Kosovës. Ai u vra në pritë në orën 03:00 të mëngjesit kur ishte ende errësirë. Me të zbardhur dita u pa se çfarëdo grupe kriminale e terroriste nuk kanë shanse me Policinë e Kosovës”, u shpreh Kurti.
Kurti theksoi se në Banjskë kishte sulm terrorist e kriminal që cenoi sigurinë, sovranitetin shtetëror dhe integritetin territorial.
“Sulmuesit që ikën duhet të ekstradohen të dorëzohen në organet e Republikës së Kosovës”, tha ai.
Kryeministri kërkoi që organizatat “Mbrojtja Civile” dhe “Brigada Veriore” të shpallen organizata terroriste edhe nga shtetet mike e aleate të Kosovës.
Kurti gjithashtu kërkoi ndëshkim ndërkombëtar për Serbinë.
“Serbia duhet të sanksionohet e të ndëshkohet ndërkombëtarisht, nëse kalon e pandëshkuar ajo do ta përsërisë krimin”, tha Kurti.
Top Channel
