Home Gjeo-Ekonomia Presidenti Zelensky kërkon t’i jepet fund pengesave për eksportet ushqimore ukrainase

Presidenti Zelensky kërkon t’i jepet fund pengesave për eksportet ushqimore ukrainase

Presidenti ukrainas, Volodymyr Zelensky ka bërë thirrje për heqjen e pengesave të vazhdueshme ndaj eksporteve të ushqimit nga vendi i tij përmes detit.

“Më shumë se 100 anije që transportojnë ushqime janë rreshtuar pranë Bosforit”, tha sot Zelensky, në një video-mesazh për një konferencë ndërkombëtare të ministrave të Bujqësisë në Berlin.

“Pse? Sepse ato duhet të inspektohen dhe përfaqësuesit rusë po e bllokojnë këtë inspektim. Anijet ndalohen për javë të tëra”, tha ai duke parashikuar si pasojë çmime më të larta ushqimore për Evropën.

”Për Azinë kjo do të thotë gjithashtu një rrezik në rritje i paqëndrueshmërisë sociale, dhe për vendet në Afrikë si Etiopia apo Sudani, tavolinat e ngrënies bosh për mijëra familje”, shtoi Zelensky, me një zotim për të vazhduar furnizimin e botës me ushqim.

”Megjithëse Rusia vazhdoi të gjuante raketa në infrastrukturën e Ukrainës, duke përfshirë portet dhe transportin, dhe të zhvillonte beteja brutale në rajonet thelbësore për bujqësinë, fermerët ukrainas vazhdojnë të mbjellin”, tha ai.

Ndërkohë, Rusia të shtunën mohoi bllokimin e anijeve ukrainase me grurë dhe fajësoi Kievin për krijimin e një “bllokimi artificial të trafikut”.

360grade.al

Share: