Opozita turke është ankuar për manipulime në referendumin e zhvilluar sot në Turqi për ndryshime kushtetuese, teksa në dy video të publikuara në rrjetet sociale pohohet manipulimi gjatë votimit.
Një video e publikuar në versionin online të gazetës turke “Cumhuriyet” tregon një person në një qendër të votimit në qytetin Eyyubiye, teksa vulos me “Po” fletat e votimit.
“Cumhuriyet” i konsideron skandal këto pamje, teksa shkruan se kutitë e votimit janë mbushur me vota “pro” referendumit.
Ndërkaq, në një video tjetër, të publikuar nga “Sozcu”, që besohet se është xhiruar në Sanliurfa, ai që besohet se është zyrtar i qendrës së votimit voton “Po”, duke thënë “oh…oh”.
Një tjetër skandal është raportuar në qytetin e Konyas. Nga një zarf dolën dy vota “Po”. Pas ankesës së vëzhguesve, u vendos që të pranohet vetëm një votë.
