Bashkëpunimi bujqësor midis Kinës dhe Afrikës ka dhënë rezultate të frytshme me një të ardhme të begatë për një partneritet gjithëpërfshirës fitues, thanë zyrtarët në Forumin e dytë mbi Bashkëpunimin Kinë-Afrikë në Bujqësi. Forumi me temë “Siguria ushqimore për Afrikën: një kapitull i ri për bashkëpunimin bujqësor Kinë-Afrikë”, u mbajt në Sanya, në provincën Hainan të Kinës Jugore.
Ministri kinez i Bujqësisë dhe Çështjeve Rurale, Tang Renjian, deklaroi në forum se gjatë dekadës së fundit Kina ka ngritur 24 qendra demonstrimi të teknologjisë bujqësore në Afrikë dhe ka popullarizuar më shumë se 300 teknologji të avancuara bujqësore, të cilat kanë rritur rendimentet e të korrave lokale, me një mesatare prej 30 deri në 60 për qind, duke përfituar më shumë se 1 milion fermerë në vendet afrikane.
Deri në fund të vitit 2021, investimet bujqësore nga ndërmarrjet kineze në Afrikë arritën në 12.8 miliardë juanë (1.77 miliardë dollarë amerikanë), duke u rritur me një normë mesatare vjetore prej 11.4 për qind dhe duke krijuar më shumë se 30.000 vende pune, shtoi Tang.
Duke vënë në dukje se bashkëpunimi në bujqësi është një mundësi e favorshme për Kinën dhe Afrikën, Josefa Leonel Correia Sacko, komisionerja e Bashkimit Afrikan (AU) për Bujqësinë, Zhvillimin Rural, Ekonominë Blu dhe Mjedisin e Qëndrueshëm, tha se Kina, e cila udhëheq modernizimin e bujqësisë përmes investimeve të rëndësishme në kërkimin shkencor dhe teknologjinë, paraqet një mundësi të madhe për Bashkimin Afrikan për të shfrytëzuar dhe nxitur prodhimin bujqësor të Afrikës, agro-industrinë dhe transformimin e zinxhirit të vlerës agro-ushqimore.
Sipas Tang, gjatë 10 viteve të fundit, Kina ka nënshkruar 34 dokumente bashkëpunimi me 19 vende afrikane, Bashkimin Afrikan dhe Aleancën për një Revolucion të Gjelbër në Afrikë (AGRA), si dhe ka zhvilluar dialogë dhe shkëmbime të vazhdueshme për çështje të tilla si siguria ushqimore, reduktimi i varfërisë, bujqësia dhe ndryshimet klimaterike.
Duke shpresuar në mundësi të konsiderueshme për infrastrukturën dhe kompanitë kineze agro-ushqimore, Hailemariam Dessalegn Boshe, kryetar i Aleancës për një Revolucion të Gjelbër në Afrikë, tha se beson se puna me kompanitë kineze mund të krijojë mundësi të favorshme dhe se mirëpret angazhimin për t’i shfrytëzuar ato.
Për sa i përket shkëmbimeve të personelit, Ministria e Bujqësisë dhe Çështjeve Rurale ka dërguar më shumë se 400 ekspertë bujqësorë në Afrikë dhe ka trajnuar më shumë se 10.000 personel menaxherial dhe teknik për vendet afrikane, tha Tang.
Demba Sabally, ministri i Bujqësisë i Gambias, deklaroi se projektet e ndihmës dhe asistencës të ofruara nga Kina janë jashtëzakonisht kuptimplotë për sektorin bujqësor të vendit të tij dhe popullsinë fermere.
“Në kuadrin e bashkëpunimit Jug-Jug, Gambia ka përfituar nga mbështetja bujare e Kinës përmes ofrimit të ekspertëve bujqësorë”, – tha ai.
Deus Gumba, ministri i Tokave i Malauit, ndau një pikëpamje të ngjashme, duke thënë: “Kina ka njohuritë dhe teknologjinë për të ndihmuar vendet afrikane në modernizimin e bujqësisë së tyre për të rritur prodhimin.
Kjo përfshin mbështetjen e shtimit të vlerës për t’u mundësuar vendeve si Malaui të eksportojnë produkte agrokulturore gjysmë të përpunuara”.
Për të ndihmuar modernizimin bujqësor të Afrikës, Kina synon të fokusohet në iniciativa për të rritur kapacitetin e prodhimit të të korrave në Afrikë, për të kryer programe novatore bashkëpunimi në shkencën dhe teknologjinë bujqësore, si dhe të zbatojë projekte demonstruese për reduktimin e varfërisë.
“Në vitet e fundit, Kina ka demonstruar vullnet dhe dëshirë të fortë për të promovuar dhe zgjeruar bashkëpunimin me Sudanin e Jugut dhe shumë vende afrikane në fushat e bujqësisë dhe sigurisë ushqimore”,- tha Josephine Lagu Yanga, ministre e Bujqësisë dhe Sigurisë Ushqimore të Sudanit të Jugut.
“Ne mbetemi të gatshëm për të ngritur bashkëpunimin tonë bujqësor me Kinën në nivelin më të lartë”,- theksoi ajo.
Në vitin 2023, vëllimi i tregtisë së produkteve bujqësore midis Kinës dhe Afrikës pritet t’i kalojë 10 miliardë dollarë, gati dyfishi i një dekade më parë dhe synimi për dekadën e ardhshme është t’i kalojë 20 miliardë dollarë./Artikulli dhe foto janë ofruar nga CRI.CN
